Dan sjećanja na žrtve Domovinskoga rata i Dan sjećanja na žrtvu Vukovara i Škabrnje obilježava se 18. studenog. Toga dana 1991. godine slomljena je herojska obrana grada Vukovara, a u Škabrnji je počinjen stravičan zločin nad stanovništvom.

Strah srca

         Bil je novembar. Zima je već naveliko uhajala va naši domi. Naši su domi, kosti i srca osin zimi bili ispunjeni strahon. Vremenski tako davne, a osjećajen još vavek bliskega 1991. leta dogodila se je tragedija.

         Vukovarska tragedija, bila je to najveća i najkrvaveja bitka Domovinskega rata, bila je to 87-dnevna opsada grada Vukovara ku je uspostavila Jugoslavenska narodna armija. Vukovar se je puna tri meseca branil nadljudskemi snagami, se do 18. novembra kad su agresorske snage okupirale grad. Ulice našeh gradi postajale su mučne, škure, ćutila se je zagušljiva boja od smrti. Judi su se bojali, trpeli, drhteli, na teleh našeh judi videli su se srhi straha, jada, užasa. Tisti judi živeli su va strahe, za saki dan svojga živjenja oni su molili. Nonići mi užaju povedat svoja domišjanja tisteh let, domišjanja ka su još vavek spravna va njiha sjećanja, tisteh let se ne vole spamećevat, tega teškega vremena, veleh ljudskeh gubitki. Užaju se spametit plača ženic, vapaji judi ki nisu zaslušili rat, ki nisu dužni naslišat zvuki pištoli, ki nisu dužni trpet i gledat kolor krvi ki se proleva po grade. Užaju se spametit straha ki se je ćutil va saken kantuniće, užaju mi povedat o gradu Vukovaru, našemu gradu Heroju, ki je teh let čuda pretrpel.

         Kuće, ulice našega grada Vukovara zavavek će bit prožeti tišinun, tišinun oneh ki već nisu z nami. Naš grad vavek će va sebe skrivat bol, muku, hrabrost. Naš grad će zavavek drhtet. Naš grad, Grad Heroj.

Nika Varljen, 4.a